ಕಥೆ-347
ಪರೀಕ್ಷೆ ಟಿಪ್ಸ್, ಸರಣಿ-4
ಪ್ರಿಯ ಪಾಲಕರೇ ಹೋಲಿಕೆ ಮಾಡದಿರಿ
ಮಕ್ಕಳು ಪರೀಕ್ಷೆಯನ್ನು ಸಮರ್ಥವಾಗಿ ಎದುರಿಸಲು ಪೂರಕವಾಗಿ ನೀವು ಮಾಡಲೇಬಾರದ ಕೆಲಸವೆಂದರೆ – ಹೋಲಿಕೆ. ಮಕ್ಕಳು ಆಯಾ ದಿನದ ಪರೀಕ್ಷೆ ಬರೆದು ಮನೆಗೆ ಬಂದಾಗ ಅವರನ್ನು “ನೀನು ಹೇಗೆ ಬರೆದಿದ್ದೀಯ” ಎಂದು ವಿಚಾರಿಸುವುದು ಸರಿ. ಆದರೆ ಅದರ ಜೊತೆಗೆ ಮಕ್ಕಳ ಸಹಪಾಠಿಗಳ ಹೆಸರುಗಳನ್ನು ಉಲ್ಲೇಖಿಸಿ “ಅವರು ಹೇಗೆ ಮಾಡಿದ್ದಾರೆ, ಇವರು ಹೇಗೆ ಮಾಡಿದ್ದಾರೆ…” ಎಂದೆಲ್ಲ ವಿಚಾರಿಸುವುದರಿಂದ ಮಕ್ಕಳು ಒತ್ತಡಕ್ಕೆ ಒಳಗಾಗುತ್ತಾರೆ. ಮಕ್ಕಳು ಪರೀಕ್ಷೆ ಬರೆಯುವುದು ತಮ್ಮ ಪ್ರಗತಿಗಾಗಿ ಹೊರತು ಮತ್ತೊಬ್ಬರ ಜೊತೆ ಸ್ಪರ್ಧಿಸಲಿಕ್ಕಲ್ಲ ಅನ್ನುವುದನ್ನು ಪೋಷಕರಾದ ನಾವು ಅರ್ಥ ಮಾಡಿಕೊಳ್ಳಬೇಕು. ಮತ್ತು ಬೇರೆಯವರ ಜೊತೆ ಹೋಲಿಸುತ್ತಾ ಮಕ್ಕಳ ಮೇಲೆ ಒತ್ತಡ ಹೇರಲು ಹೋಗಬಾರದು.
ಇಷ್ಟು ಮಾಡುವುದು ಬಹಳ ಸುಲಭ ಅಲ್ಲವೆ? ಇವಿಷ್ಟರ ಜೊತೆ ಪೋಷಕರು ಹೆಚ್ಚುವರಿಯಾಗಿ ಇನ್ನೂ ಒಂದು ಕೆಲಸ ನಾವು ಮಾಡಬಹುದು. ಮಲಗುವ ಮುನ್ನ ಐದರಿಂದ ಹತ್ತು ನಿಮಿಷಗಳ ಕಾಲ ಕಣ್ಣುಮುಚ್ಚಿ ಸಮಾಧಾನದಿಂದ ಕುಳಿತುಕೊಳ್ಳಿ. ನಿಮ್ಮ ಆತಂಕವನ್ನೂ ಒತ್ತಡವನ್ನೂ ತಹಬಂದಿಗೆ ತಂದುಕೊಳ್ಳಿ. ಧ್ಯಾನದಿಂದ ಮನಸ್ಸನ್ನು ಶಾಂತಗೊಳಿಸಿಕೊಳ್ಳಿ. ಅನಂತರ ಮಕ್ಕಳ ಜೊತೆ ಸಂತೋಷದಿಂದ, ಪ್ರೀತಿಯಿಂದ ನಾಲ್ಕು ಮಾತುಗಳನ್ನಾಡಿ, ಅವರ ಜೊತೆ ನೀವಿದ್ದೀರೆಂಬ ಭರವಸೆ ತುಂಬಿ ಮಲಗಿಸಿ. ಮಕ್ಕಳಿಗೆ ನನ್ನ ಹಿಂದೆ ಪಾಲಕರಿದ್ದಾರೆ ಎನ್ನುವ ಒಂದು ಧೈರ್ಯ ದೊಡ್ಡದು, ನೀವು ತೋರುವ ಈ ಪ್ರೀತಿ ಎದುರು ಮಕ್ಕಳು ಶಾಲೆಯ ಪರೀಕ್ಷೆಗಳೇನು, ಬದುಕಿನ ಪರೀಕ್ಷೆಯನ್ನೇ ನಗುನಗುತ್ತ ಗೆದ್ದು ಬರುವುದು ಖಚಿತ!
👍💐💐💐💐💐
