Shankargouda Basapur

ಕಥೆ-812

Happy friendship day 💐💐💐💐💐

ಮನೆಯ ವರಾಂಡದಲ್ಲಿ ಚಿಂತಿತನಾಗಿ ಕುಳಿತಿದ್ದ ರಮೇಶ. ಅಮ್ಮನಿಗೆ ಔಷಧಿ ತರುವ ಬಗ್ಗೆ ಆಲೋಚಿಸುತ್ತಿದ್ದ. ಅವನಿಗೆ ಸ್ವಲ್ಪ ಹಣದ ಅವಶ್ಯಕತೆಯಿತ್ತು. ಪಕ್ಕದ ಮನೆಯವರ ಫೋನನಿಂದ ಗೆಳೆಯ ಸುರೇಶನಿಗೆ ಫೋನ್ ಮಾಡಿದ. "ಅಮ್ಮನ ಔಷಧಿಗಾಗಿ ಸ್ವಲ್ಪ ಹಣದ ಅವಶ್ಯಕತೆಯಿದೆ. ಸಾಲ ಕೊಡ್ತೀಯಾ ? ಎಂದು ಕೇಳಿದ.

ಗೆಳೆಯಾ ನೀನು ಒಂದೆರಡು ಗಂಟೆ ಬಿಟ್ಟು ಫೋನ್ ಮಾಡೆಂದ. ಈತ ಮತ್ತೆ ಫೋನ್ ಮಾಡಿದಾಗ ಫೋನ್ ಸ್ವಿಚ್ ಆಫ್ ಬರುತ್ತಿತ್ತು.

ಇವನಿಗೆ ಬೇಸರವಾಯಿತು.

"ಇಲ್ಲದಿದ್ದರೆ ಇಲ್ಲ ಅನ್ನಬಹುದಿತ್ತು. ಆಸೆ ಹುಟ್ಟಿಸುವುದಾದರೂ ಯಾಕೆ ! " ಎಂದು ಮನದಲ್ಲೇ ಕೋಪಗೊಂಡ.

      ಬಳಿಕ ಪೇಟೆ ಕಡೆ ನಡೆದು ಯಾರಾದರೂ ಸಿಕ್ಕಿಯಾರಾ ಎಂಬ ಆಸೆಯಿಂದ ಪಾದ ಬೆಳೆಸಿದ. ಒಂದೆರಡು ಬಾರಿ ಗೆಳೆಯನಿಗೂ ಫೋನ್ ಮಾಡಿದ. ಮತ್ತೆ ಅದೇ ಸ್ವಿಚ್ ಆಫ್ ಎಂದು ಹೇಳುತ್ತಿತ್ತು.

      ಸಂಜೆ ತನಕ ಸುತ್ತಾಡಿ ಏನೂ ಪ್ರಯೋಜನವಾಗದೆ ಮನೆಕಡೆ ಖಿನ್ನಿತನಾಗಿ ಬರಿ ಗೈಲಿ ಮರಳಿದ. ಮನೆಗೆ ಬಂದು, ಅಮ್ಮನಿಗೆ ಔಷಧಿ ತರಲಾಗಲಿಲ್ಲ ಎಂಬ ನೋವಿನೊಂದಿಗೆ ಅಮ್ಮನ ಕೋಣೆಗೆ ದೌಡಾಯಿಸಿದ. ಅಮ್ಮನ ಮುಖದಲ್ಲಿ ನಗು ಕಂಡಿತು... ಅಮ್ಮನ ಟೇಬಲಲ್ಲಿ ಸಾಕಷ್ಟು ಔಷಧಿ, ಗುಳಿಗೆ, ಕಷಾಯಗಳಲ್ಲದೆ ಒಂದಿಷ್ಟು ಹಣ್ಣು-ಹಂಪಲು ಕಾಣಸಿಕ್ಕಿತು.

ಪಕ್ಕದಲ್ಲಿದ್ದ ತಂಗಿಯಲ್ಲಿ ಕೇಳಿದ: "ಇದೆಲ್ಲಾ ಯಾರು ತಂದದ್ದು ? "

ಆಗ ತಂಗಿ: "ನಿನ್ನ ಗೆಳೆಯ ಸುರೇಶ ತಂದುಕೊಟ್ಟದ್ದು" ಎಂದು ಹೇಳಿದಳು.

ಇವನ ಕಣ್ಣಲ್ಲಿ ನೀರು ಬಂತು. ಕೂಡಲೇ ಗೆಳೆಯನ ಮನೆ ಕಡೆ ಹೊರಟ.

      ಗೆಳೆಯನ ಮನೆಗೆ ಹೋಗಿ "ನಿನಗೆಷ್ಟು ಫೋನ್ ಮಾಡಿದೆ. ಆದರೆ ಸ್ವಿಚ್ ಆಫ್ ಮಾಡಿದ್ದೆ " ಎಂದು ಹೇಳಿದ.

ಅದಕ್ಕೆ ಗೆಳೆಯ " ಫೋನನ್ನು ಮಾರಿದ್ದೇನೆ" ಎಂದು ಹೇಳಿದ.

ಅವನ ಕಣ್ಣಲ್ಲೂ ನೀರು ಜಿನುಗಿತು.

ರಕ್ತ ಸಂಬಂಧವನ್ನು ಮೀರಿದ್ದು ಸ್ನೇಹ ಸಂಬಂಧ.... ಯಾವುದೇ ಜಾತಿ, ಬಣ್ಣ, ಜನಾಂಗ, ಸಂಸ್ಕೃತಿಯ ಬೇಧವಿಲ್ಲದೇ ಸ್ನೇಹದ ಬಲವಾದ ಬಂಧ ಮತ್ತು ಪ್ರೀತಿಯ ಪ್ರಾಮುಖ್ಯತೆಯನ್ನು ಸಾರಲು ಸ್ನೇಹಿತರ ದಿನಾಚರಣೆ ಪ್ರಮುಖ ಪಾತ್ರವಹಿಸುತ್ತಿದೆ.

ನಿಜವಾದ ಸ್ನೇಹ ಬಹುಕಾಲ ಉಳಿ­ಯಬೇಕಾದರೆ ಮುಖವಾಡಗಳು ಅಪ್ರಯೋಜಕ. ಅವುಗಳನ್ನು ಕಳಚಿ ಅತ್ಯಂತ ಪ್ರಾಮಾಣಿಕತೆಯಿಂದ ಕೈ ಚಾಚಿದರೆ ಸ್ಥಿರವಾದ ಸ್ನೇಹ ನೆಲೆಯಾ­ಗುತ್ತದೆ. ಕಪಟದ ಸ್ನೇಹ ಅಲ್ಪಾಯುಷಿ.. 

ಭಾರತದಲ್ಲಿ, ಆಗಸ್ಟ್ ಮೊದಲ ಭಾನುವಾರದಂದು ಸ್ನೇಹಿತರ ದಿನವನ್ನು ಆಚರಿಸಲಾಗುತ್ತದೆ. 

ನಮಗೆ ಯಾವುದೇ ಸಮಸ್ಯಯಿದ್ದರೂ ಅದಕ್ಕೊಂದು ಪರಿಹಾರ ನಮ್ಮ ಗೆಳಯರ ಬಳಿ ಇರುತ್ತದೆ ಎಂಬ ಬಲವಾದ ನಂಭಿಕೆ ನಮ್ಮಲ್ಲಿ ಇರುತ್ತದೆ. ಸುಖ, ದುಃಖ ಸಂತೋಷ, ನೋವುಗಳಲ್ಲಿ ನಮ್ಮ ಕುಟುಂಬದವರಂತೆ ನಮ್ಮೊಂದಿಗೆ ಇರುವರು ನಮ್ಮ ಸ್ನೇಹಿತರು... ಎಂಬ ಹೆಮ್ಮೆ... "A friend in need Is a friend indeed"

Happy friendship day 🙏💐💐💐💐💐

-Shankargouda Basapur