ಕಥೆ-622
ಸಾರ್ಥಕ ಬದುಕು
ಒಂದು ಸಸಿಯು ಹೆಮ್ಮರವಾಗಿ ಬೆಳೆದು ನಿಂತರೆ, ಅದು ಅಸಂಖ್ಯ ಪಶು ಪಕ್ಷಿಗಳಿಗೆ, ಜನರಿಗೆ ನೆರಳು ನೆರವು, ಹೂವು ಕಾಯಿ ಹಣ್ಣು ಕೊಡುತ್ತದೆ. ಆ ಮರಕ್ಕೆ ನಮ್ಮಂತೆ ಕೈ ಕಾಲು, ಕಣ್ಣು, ಏನೂ ಇಲ್ಲ. ಆದರೆ ಅದು ಮಾಡುವ ಸತ್ಕಾರ್ಯ ಸಣ್ಣದಲ್ಲ. ಬೇಸಿಗೆಯ ಬಿಸಿಲಿನಲ್ಲಿ ದಣಿದು ಬಂದ ಮನುಷ್ಯನಿಗೆ ಒಂದು ಹಣ್ಣಿನ ಮರ ಅಥವಾ ನೆರಳಿನ ಮರ ಕಂಡರೆ ಹೃದಯ ತುಂಬಿ ಬರುತ್ತದೆ, ಮನಸ್ಸು ಅರಳುತ್ತದೆ. ಹೆಚ್ಚೇನು ಸ್ವರ್ಗವೇ ಕಂಡಷ್ಟು ಸಂತಸವಾಗುತ್ತದೆ. ನಮ್ಮ ಜೀವನವು ಒಂದು ಹೆಮ್ಮರವಾಗಿ ಬೆಳೆಯಬೇಕು. ನೆರೆಹೊರೆಯವರಿಗೆ ಬಂಧು, ಬಳಗದವರಿಗೆ ಒಲವಿನ ಆಶ್ರಯ ನೀಡಬೇಕು. ಪ್ರಪಂಚದ ತಾಪದಿಂದ ಬಳಲಿ ಬಂದವರಿಗೆ ನೆಮ್ಮದಿಯ ನೆರಳು ನೀಡಬೇಕು. ಅದು ಸಾರ್ಥಕ ಬದುಕು. ನಮ್ಮ ಎಲ್ಲ ಸಿರಿ-ಸಂಪದ, ಶಕ್ತಿ-ಸಾಮರ್ಥ್ಯ ವಿದ್ಯೆ-ಬುದ್ದಿ ಇರುವುದೇ ಈ ಬದುಕನ್ನು ಸುಂದರಗೊಳಿಸುವುದಕ್ಕಾಗಿ, ಸಾರ್ಥಕಗೊಳಿಸುವುದಕ್ಕಾಗಿ.
ಶ್ರೀ ಸಿದ್ದೇಶ್ವರ ಸ್ವಾಮಿಗಳು
No comments:
Post a Comment