ಕಥೆ-765
ಸೋತರೂ ಪ್ರಯತ್ನಿಸುವುದನ್ನು ನಿಲ್ಲಿಸಬಾರದು
https://basapurs.blogspot.com
ನಾವು ಒಂದು ಪಂದ್ಯ ಆಡುವಾಗ, ಅದೆಷ್ಟೇ ಶಕ್ತಿ ಮೀರಿ ಪ್ರಯತ್ನಿಸಿದರೂ ಒಮ್ಮೊಮ್ಮೆ ಸೋಲಬೇಕಾಗುತ್ತದೆ. ಕೆಲವೊಮ್ಮೆ ಸಾಕಷ್ಟು ಅವಮಾನಗಳನ್ನೂ ಸಹಿಸಬೇಕಾಗುತ್ತದೆ. ಮುಂದಿನ ಪಂದ್ಯದಲ್ಲಿ ನಾವು ನಮಗಾದ ಸೋಲು ಅಥವಾ ಅವಮಾನದ ಪ್ರತೀಕಾರಕ್ಕಾಗಿ ಆಡುತ್ತೇವೆ. ಹೇಗಾದರೂ ಸರಿ, ಕಳೆದ ಪಂದ್ಯದಲ್ಲಿ ಆಗಿದ್ದನ್ನು ಮರೆಯುವುದಕ್ಕೆ ಹೋರಾಡುತ್ತೇವೆ. ಆ ಹೋರಾಟದಲ್ಲಿ ಇನ್ನಷ್ಟು ಸಮಸ್ಯೆಗಳಾಗುವ ಸಾಧ್ಯತೆ ಇದೆ. ಹಾಗಾಗಿ, ಇಲ್ಲಿ ಪ್ರತೀಕಾರ ಎನ್ನುವ ಪದವೇ ಬರಬಾರದು. ನಾವು ಗೌರವ ಮತ್ತು ಘನತೆಯನ್ನು ಎತ್ತಿಹಿಡಿಯುವುದಕ್ಕೆ ಅಥವಾ ಕಾಪಾಡುವುದಕ್ಕೆ ಆಡಬೇಕೇ ಹೊರತು, ಯಾರದ್ದೋ ಮೇಲಿನ ಸೇಡಿಗಾಗಿ ಆಟ ಆಡುವುದಕ್ಕೆ ಹೋಗಬಾರದು. ಇದು ಬರೀ ಪಂದ್ಯದಲ್ಲಿ ಮಾತ್ರವಲ್ಲ, ಜೀವನದಲ್ಲೂ ಬಹಳ ಮುಖ್ಯ. ನಾವು ಯಾವತ್ತೂ ನಮ್ಮ ಗೌರವ ಮತ್ತು ಘನತೆಗಳನ್ನು ಎತ್ತಿ ಹಿಡಿಯುವಂತಹ ಕೆಲಸಗಳನ್ನು ಮಾಡಬೇಕೇ ಹೊರತು, ಅದನ್ನು ಕಳೆದುಕೊಳ್ಳುವ ನಿಟ್ಟಿನಲ್ಲಿ ಯಾವುದೇ ಕೆಲಸವನ್ನೂ ಮಾಡಬಾರದು. ಒಂದು ಪಕ್ಷ ನಾವು ಒಂದು ಪಂದ್ಯದಲ್ಲಿ ಸೋಲಬಹುದು. ಮುಂದಿನ ಪಂದ್ಯದಲ್ಲಿ ಹೇಗೆ ಗೆಲ್ಲಬೇಕು ಎಂಬುದನ್ನು ಯೋಚಿಸಬೇಕು. ಆ ನಿಟ್ಟಿನಲ್ಲಿ ಪ್ರಯತ್ನ ಮಾಡಬೇಕು. ನಾನು ಆಡುವಾಗ ಕೆಲವು ಪಂದ್ಯಗಳಲ್ಲಿ ಸೋತಿರಬಹುದು. ಹಾಗಂತ 'ಯಾವತ್ತೂ ಪ್ರಯತ್ನಿಸುವುದನ್ನು ನಾನು ನಿಲ್ಲಿಸಿಲ್ಲ. ಪ್ರಯತ್ನ ಮಾಡುತ್ತಲೇ ಇದ್ದೆ ಮತ್ತು ಅದೇ ಪ್ರಯತ್ನಗಳೇ ನನ್ನನ್ನು ಗೆಲ್ಲಿಸಿವೆ ಎಂದರೆ ತಪ್ಪಿಲ್ಲ.
ರಾಹುಲ್ ದ್ರಾವಿಡ್
ಖ್ಯಾತ ಕ್ರಿಕೆಟಿಗ
No comments:
Post a Comment